에베소서 6장 쇼나

1. ¹ Vana, teererai vabereki venyu muna Ishe; nokuti izvi zvakarurama.
2. ² Kudza baba vako namai, unova murairo wekutanga une chivimbiso,
3. ³ kuti zvikunakire, uye urarame nguva refu panyika.
4. ⁴ Nemwi vana baba, musatsamwisa vana venyu, asi varerei pakuranga nekutsiura kwaIshe.
5. ⁵ Varanda, teererai vatenzi venyu panyama, nekutya nekudedera, nemoyo wenyu wakarurama sekuna Kristu;
6. ⁶ kwete nekushandira maziso, sevafadzi vevanhu, asi sevaranda vaKristu, vanoita kuda kwaMwari kubva pamoyo;
7. ⁷ muchishanda nechido chakanaka sekuna Ishe uye kwete kuvanhu;
8. ⁸ muchiziva kuti chinhu chipi nechipi chakanaka umwe neumwe chaanoita, achagamuchira ichochi kuna Ishe, kana muranda, kana wakasununguka.
9. ⁹ Nemwi madzitenzi, itai zvinhu zvimwezvo kwavari, muchirega kuvhundudzira; muchiziva kutiwo Tenzi wenyu pachenyu uri kumatenga; uye kwaari hakuna rusarura rwevanhu.
10. ¹⁰ Pakupedzisira hama dzangu, simbai muna Ishe, nemukugwinya kwesimba rake.
11. ¹¹ Shongai zvombo zvese zvaMwari, kuti mugone kumirisana nemano adhiabhorosi;
12. ¹² nokuti hatirwisani neropa nenyama, asi neutongi, nemasimba, nevatungamiriri verima renyika ino, nemweya yakaipa kunzvimbo dzekumatenga.
13. ¹³ Saka torai zvombo zvese zvaMwari kuti mugone kuramba mumire pazuva rakaipa, maita zvese, mumire.
14. ¹⁴ Naizvozvo mirai, zvivuno zvenyu zvakasungwa nechokwadi, makapfeka chidzitiro chechifuva chekururama,
15. ¹⁵ uye makasunga tsoka negadziriro yeevhangeri yerugare;
16. ¹⁶ pamusoro pezvese matora nhoo yerutendo, yamungagona kudzima nayo miseve yese inopfuta yewakaipa.
17. ¹⁷ Uye torai ngowani yeruponeso, nemunondo weMweya, unova shoko raMwari;
18. ¹⁸ muchinyengetera nguva dzese nemunyengetero wese nemukumbiro muMweya, muchirinda pazvinhu izvi nekutsungirira kwese nekukumbirira vatsvene vese,
19. ¹⁹ nepamusoro pangu, kuti shoko ripiwe kwandiri pakushamisa muromo wangu neushingi kuti ndidudzire zvakavanzika zveevhangeri,
20. ²⁰ yandiri nhume yayo mumaketani, kuti mairi nditaure ndisingatyi, sezvandinofanira kutaura.
21. ²¹ Asi kuti imwiwo muzive zvakanangana neni, kuti ndinoitei, Tikiko hama inodikanwa, nemushumiri wakatendeka muna Ishe, achakuzivisai zvinhu zvese;
22. ²² wandakatuma kwamuri nechinangwa ichi, kuti muzive zvakanangana nesu, uye anyaradze moyo yenyu.
23. ²³ Rugare kuhama, nerudo pamwe nerutendo rwunobva kuna Mwari Baba naIshe Jesu Kristu.
24. ²⁴ Nyasha ngadzive nevese vanoda Ishe wedu Jesu Kristu nekusingaperi. Ameni.