골로새서 2장 쇼나

1. ¹ Nokuti ndinoda kuti muzive kuti kurwa kukuru zvakadini kwandinako pamusoro penyu, nevari paRaodhikia, nevese vasina kuona chiso changu panyama,
2. ² kuti moyo yavo inyaradzwe, vasonanidzwe murudo, nemufuma yese yekuvimbiswa kwakakwana kwekunzwisisa, paruzivo rwechakavanzika chaMwari naBaba, nechaKristu,
3. ³ maari fuma yese yeuchenjeri neyeruzivo yakavigwa.
4. ⁴ Ndinoreva izvi, kuti kusava nemunhu anokunyengerai nemashoko anonyengera.
5. ⁵ Nokuti kunyange ndisipo panyama, zvakadaro ndinemwi pamweya, ndichifara nekuvona kurongeka kwenyu, nekusimba kwerutendo rwenyu muna Kristu.
6. ⁶ Naizvozvo sezvamakagamuchira Kristu Jesu Ishe, fambai maari,
7. ⁷ makadzika midzi nekuvakwa maari, nekusimbiswa murutendo, sezvamakadzidziswa, muchiwedzera makuri nekuvonga.
8. ⁸ Chenjerai, zvimwe umwe munhu angakupambai neuchenjeri, nekunyengera kusina maturo, setsika dzevanhu, sedzidziso dzekuvamba dzenyika, uye kwete sekuna Kristu.
9. ⁹ Nokuti kuzara kwese kweuMwari kunogara maari pamuviri.
10. ¹⁰ Uye makazadziswa maari, iye musoro weutungamiriri hwese nesimba;
11. ¹¹ wamakadzingiswawo maari nedzingiso isina kuitwa nemaoko, pakubvisa muviri wezvivi zvenyama, pakudzingisa kwaKristu;
12. ¹² makavigwa pamwe naye pabhabhatidzo, pamakamutswawo pamwe naye nerutendo rwekuita kwaMwari, wakamumutsa kubva kuvakafa.
13. ¹³ Nemwi makafa mukudarika nekusadzingiswa kwenyama yenyu, wakakuitai vapenyu pamwe naye, akukanganwirai kudarika kwese,
14. ¹⁴ akadzima rugwaro rwezviga rwaipikisana nesu, rwaipesana nesu, akarubvisa pakati, aruroverera pamuchinjikwa;
15. ¹⁵ akurura vatungamiriri nemasimba, akavabudisa pachena, akatungamira kuvakunda mauri.
16. ¹⁶ Naizvozvo kusava nemunhu anokutongai pakudya kana pachinwiwa, kana panhau yemutambo kana yekugara kwemwedzi kana yemasabata;
17. ¹⁷ zvinova mumvuri wezvinhu zvichauya, asi muviri ndewa Kristu.
18. ¹⁸ Kusava nemunhu anokutorerai mubairo wenyu nemano, achifarira kuzvininipisa nekunamata vatumwa, achipindira pazvinhu zvaasina kuona, achizvikudza pasina nefungwa dzake dzenyama,
19. ¹⁹ uye asingabatisisi Musoro, uyo maari muviri wese nezvisungo nemarunda unoriritirwa, nekurukirwa pamwe, uchikura nekukura kwaMwari.
20. ²⁰ Naizvozvo kana makafa pamwe naKristu kune dzidziso dzekuvamba dzenyika, munosungikanirei nemirairo semugere munyika,
21. ²¹ (usabata, usaravira, usagunzva,
22. ²² izvo zvese zvichaparara nekushandiswa) semirairo nedzidziso dzevanhu?
23. ²³ Zvine chimiro cheuchenjeri pakuzvidira kunamata, nekuzvininipisa, nekutambudza muviri; hazvitongobatsiri kukunda kugutsa nyama.