골로새서 3장 쇼나

1. ¹ Naizvozvo kana makamutswa pamwe naKristu, tsvakai zvekumusoro, uko kuna Kristu agere kuruoko rwerudyi rwaMwari.
2. ² Rangarirai zviri kumusoro, kwete zviri panyika.
3. ³ Nokuti makafa, uye upenyu hwenyu hwakavigwa pamwe naKristu muna Mwari.
4. ⁴ Kana Kristu upenyu hwedu achionekwa, ipapo imwiwo muchaonekwa pamwe naye mukubwinya.
5. ⁵ Naizvozvo urayai mitezo yenyu iri panyika, upombwe, tsvina, kushumba kwakaipa, kuda zvakaipa, uye kuchiva, kunova kunamata zvifananidzo.
6. ⁶ Nekuda kwezvinhu izvi, hasha dzaMwari dzinouya pavana vekusateerera;
7. ⁷ imwiwo maimbofamba mazviri, pamairarama mazviri.
8. ⁸ Asi ikozvino imwiwo bvisai zvese izvi, kutsamwa, hasha, uipi, kunyomba, nekutaura zvinonyadzisa kubva mumuromo wenyu;
9. ⁹ regai kureverana nhema, zvamakabvisa munhu wekare nemabasa ake,
10. ¹⁰ mukapfeka mutsva, anovandudzwa paruzivo semufananidzo wewakamusika;
11. ¹¹ apo pasina muGiriki uye muJudha, kudzingiswa uye kusadzingiswa, mutorwa, muSikitia, musungwa, wakasununguka; asi Kristu ndiye zvese, uye ari mune zvese.
12. ¹² Naizvozvo pfekai sevasanangurwa vaMwari, vatsvene nevanodikanwa, moyo yetsitsi, moyo munyoro, kuzvininipisa, unyoro, nemoyo murefu;
13. ¹³ muchiitirana moyo murefu, nekukanganwirana kana umwe ane mhosva neumwe; Kristu sezvaakakukanganwiraiwo, saizvozvowo imwi;
14. ¹⁴ zvino pamusoro pezvinhu zvese izvi pfekai rudo, ndicho chisungo chekupedzeredza.
15. ¹⁵ Nerugare rwaMwari ngarwutonge mumoyo yenyu, ndirwo rwamakadanirwawo mumuviri mumwe; uye ivai vanovonga.
16. ¹⁶ Shoko raKristu ngarigare mamuri neufumi muuchenjeri hwese; muchidzidzisana nekurairana mumapisarema, nenziyo, nenziyo dzemweya, muimbire Ishe nenyasha mumoyo wenyu;
17. ¹⁷ uye zvese chero chipi chamunoita pashoko kana pachiito, itai zvese muzita raIshe Jesu, muchivonga Mwari naBaba kubudikidza naye.
18. ¹⁸ Vakadzi zviisei pasi pevarume venyu pachenyu, sezvo zvakafanira muna Ishe.
19. ¹⁹ Varume, idai vakadzi venyu, uye regai kuvavavira.
20. ²⁰ Vana, teererai vabereki pazvinhu zvese, nokuti izvi zvinofadza Ishe.
21. ²¹ Madzibaba, musatsamwisa vana venyu, kuti varege kuora moyo.
22. ²² Varanda, teererai pazvinhu zvese vari vatenzi venyu panyama; kwete nekushandira maziso sevafadzi vevanhu, asi nemoyo wakarurama, muchitya Mwari;
23. ²³ uye zvese kunyange chipi chamunoita, itai nemoyo, sekuna Ishe, uye kwete kuvanhu;
24. ²⁴ muchiziva kuti kuna Ishe muchagamuchira mubairo wenhaka; nokuti munoshandira Ishe Kristu.
25. ²⁵ Asi anoita zvisakarurama achagamuchira zvisakarurama zvaakaita; uye hakuna kusarurwa kwavanhu.