시편 49편 폰페이어

1. ¹ Komail kainok kan karos rong o dedeki, komail toun sap karos,
2. ² Ir karos, aramas o saupeidi, ir karos me kapwapwa o samama kan!
3. ³ Au ai pan kaparok duen lolekong, o mongiong i duen lamalam pung.
4. ⁴ I pan kapaike dong salong ai lepen masan, o i pan kasaleda me rir akan ni ngil en arp.
5. ⁵ Da me i en masak ni ran apwal akan, ma me sapung kan kapil ia pena,
6. ⁶ Me kin kaporoporeki ar dipisou o suaiki ar kapwa toto?
7. ⁷ Pwe sota me kak dorela ri a, de tomeki i ren Kot,
8. ⁸ (Pwe meid apwal, en dorela ngen ar; a sota pan pwaida kokolata).
9. ⁹ Pwen maur potopot o sota kilang sousou o.
10. ¹⁰ Pwe a kin kilang, me lolekong kan kin mela dueta me pweipwei o iakalar akan, o re pan mueid ong amen ar dipisou kan.
11. ¹¹ I me re kin peren kida, ma im arail pan duedueta, o deu ’rail pan mimieta kokolata; o re konekon melel nin sappa.
12. ¹² Ari so, aramas me konekon sota kak mimieta ni mepukat, pwe a pan kokowei dueta man amen.
13. ¹³ Iet ar wiawia pukat meid pweipwei; ari so, kadaudok ar kin kapinga ki au arail. Sela.
14. ¹⁴ Re wonon nan wasan mela dueta pwin sip; mela kin kamanga ir; a me lelapok kan pan kaun irail da madang, o mom ar pan soredi, o re pan doo sang deu ’rail, mimieta nan pweleko.
15. ¹⁵ A Kot pan kotin dorela ngen i sang nan mana en wasan mela, pwe a pan kotin sapwilimane kin ia. Sela!
16. ¹⁶ Koe der puriamuiki, ma amen pan kapwapwala, o ma lingan en im a pan laudala.
17. ¹⁷ Pwe a sota pan wala meakot ni a pan mela, o a lingan sota pan idauenla i.
18. ¹⁸ A kin insenemau kila peren en maur kaselel wet, o aramas kin kapinga ir, me kin apapwali pein ir eta ni maur et.
19. ¹⁹ A pan idauen la sam a kan, ap solar kilang marain kokolata.
20. ²⁰ Ari, ma aramas amen indand mau, ap sota a lamalam, a pan kokowei dueta man amen.