누가복음 22장 폰페이어

1. ¹ A KAMADIP en prot somut korendor, me adaneki pasa.
2. ² Samero lapalap o saunkawewe kan raparapaki, pwen kamatala i, pwe irail masak aramas akan.
3. ³ A Satan tilong ong Iudas me adaneki Iskariot, me kisan ekriamen ko.
4. ⁴ I ari koieila ren samero lapalap o saumas akan, kalelapok duen a pan pangalang ir i.
5. ⁵ Irail ari peren kida, wiaki eu en ki ong i moni.
6. ⁶ I ari inauki ong irail, o raparapaki, duen a pan pangalang ir i so moromorong.
7. ⁷ Ran en prot somut ap leler, ansaun kamela pasa.
8. ⁸ I ari poronela Petrus o Ioanes masani: U kowei, kaonopadang kitail pasa, pwe kitail en manga.
9. ⁹ Irail idok re a: Ia wasa, re kotin kupura, sen kaonopada?
10. ¹⁰ A kotin masani ong irail: Kilang, koma lao pedelong kanim o, aramas amen pan tu ong koma, me wa pakit en pil eu, idauen i nan im o, me a pedelong ong lole!
11. ¹¹ Koma ap indang kaun pan im o: Saunpadak o masanie dong komui: Ia pera en kairu, wasa I pan manga pasa ia iangaki ai tounpadak kan?
12. ¹² I ari pan kasale ong koma weip poa eu, me audeki men momod, i wasa koma pan kaonopada!
13. ¹³ Ira lao koieila, ap diarada, duen a kotin masani ong ira; ira ap kaonopada pasa.
14. ¹⁴ Auer lao leler, i ap kaipokedi ni tepel o wanporon ekriamen iang i.
15. ¹⁵ I ap kotin masani ong irail. I anane melel iang komail manga pasa wet mon ai pan kalokolok.
16. ¹⁶ Pwe I indai ong komail, I solar pan kang sang met kokolata, a lao kapungala nan wein Kot.
17. ¹⁷ I ari kotikida dal o laolaoki ap masani: Ale met, nek nan pung omail!
18. ¹⁸ Pwe I indai ong komail, I solar pan nim sang kisan wan wain, wein Kot lao pwaidar.
19. ¹⁹ A kotin limada prot, laolaoki o pilitiki pena, ap kotiki ong irail masani: War ai metet, me pangalang komail! Komail en wia me wet, men kataman kin ia.
20. ²⁰ O pil dal en nim murin kasipong masani: Dal wet kadede kap ni mom en nt’ ai, me kapwilepilidi ong komail.
21. ²¹ A kilang, pa en me pan pang ia la, me iang ia ni tepel o.
22. ²² Nan melel, Nain aramas pan kokola duen a kileledier, a suedi ong aramas o, me a pan pangkila!
23. ²³ Irail ari pikikidi idok nan pung arail, is re irail, me pan wiada met?
24. ²⁴ Irail pil akamaiki nan pung arail, duen is me pan lapalap re irail.
25. ²⁵ A kotin masani ong irail: Nanmarki en wei pokon akan kin poe irail edi o me manaman akan kin adaneki monsap kalangan.
26. ²⁶ A komail sota pan dueta, a me lapalap re omail, i en dueta me tikitik, o me kin kaunda, en dueta me kin papa.
27. ²⁷ Pwe is me lapalap ren me mondi ni tepel de me kin papa? Kaidin i, me mondi ni tepel? A ngai dueta ladu pamail.
28. ²⁸ Nan komail me iang ia ni ai songesong.
29. ²⁹ Ngai ari kileledi ong komail wei eu, duen Sam ai kileledi ong ia er;
30. ³⁰ Pwe komail en manga o nim ni ai tepel nan ai wei o mondi pon men mondi ko, kakaun kainok en Israel eisokriau.
31. ³¹ Kaun ap kotin masani: Simon, Simon, kilang, Satan ngongkin komail, pwen koko komail dueta wan prot.
32. ³² A ngai me kapakapa kin uk, pwe om poson de nikila. A koe lao sapaledo kakelada ri om ol akan!
33. ³³ A a potoan ong i: Maing, i pan idauen ir lel nan imateng o matala.
34. ³⁴ A kotin masani: Petrus, I indai ong uk, nan malek sota pan kakorot ran wet, koe lao kamamki pan silepak, me koe asa ia.
35. ³⁵ A kotin masani ong irail: Ni ai kadar komail wei so ed en moni, o so ed en sailok, o so sut, meakot komail lekekilar? Re ap potoan ong: Sota.
36. ³⁶ I ari kotin masani ong irail: A met, me a ed en moni mia, en ale o pil ed en sailok, o me so a, i en netekila a likau, ap id netiada kodlas pot.
37. ³⁷ Pwe I indai ong komail, me intingidier, pil pan pwai ong ia: A wadawad ong me dipan akan, pwe me intingidier duen ngai, pan kaimwisokala.
38. ³⁸ Irail indada: Maing, kotin masani, iet kodlas riapot. A kotin masani ong irail. Ari, i eta.
39. ³⁹ I ari kotilang dol Oliwe, duen a kin wia; tounpadak kan idauenla i.
40. ⁴⁰ I lao lel ong wasa o, ap kotin masani ong irail: Komail kapakap pwe komail de ko ong nan songesong.
41. ⁴¹ I ari tororela sang irail doo weita kapir won takai eu, ap kelepuki laolao.
42. ⁴² Masani: Sam (ai), ma komui mauki, koti ki wei sang ia dal wet, ari so, kaidin insen ai, pwe kupur omui ta en wiaui.
43. ⁴³ Nan tounlang amen pwarado sang nanlang katinada i.
44. ⁴⁴ A ni a kotin pador ong mela, ap ngiangiang a laolao, lao pudo a likamata nta, me dingedingedi ong nan pwel.
45. ⁴⁵ A kotida sang a laolao o kotin pur ong tounpadak kan, ir mamair aki ar mamauk.
46. ⁴⁶ Masani ong irail: Da me komail mamairki? Paurida o kapakap, pwe komail de ko ong nan songesong!
47. ⁴⁷ A ni a kotin masani mepukat, kilang, pokon o, o me adaneki Iudas, amen ir ekriamen, tiong mo ’rail, kaikai dong Iesus, pwen metik i.
48. ⁴⁸ A Iesus kotin masani ong i: Iudas, koe pan pang kila metik eu Nain aramas?
49. ⁴⁹ Irail me iang i lao kilanger me pan wiaui, rap indai ong i: Maing, se so pan wokieki ir kodlas?
50. ⁵⁰ Amen ir pala ladun samero lapalap amen o sara sang salong a pali maun.
51. ⁵¹ Iesus ap kotin sapeng masani: Arier! I ap kotin sair salong a, kakelada i.
52. ⁵² Iesus ap kotin masani ong samero lapalap akan, o kaun pan im en kaudok, o saumas akan, me ko dong i: Dueta lolap amen, me komail koko dong, wa kodlas o katiu kai?
53. ⁵³ Ni ran karos ngai iang komail nan im en kaudok, a komail sota man sair ia, pwe ansau wet omail ansau o manaman en rotorot.
54. ⁵⁴ Re ap saikidi i o kalualong ong nan im en samero lapalap o, a Petrus idauenla doowei sang.
55. ⁵⁵ Irail ap saunda kisiniai eu nan warong en kel o mod pena, a Petrus mondi nan pung arail.
56. ⁵⁶ A lidu men kilang i a momod impan kisiniai o kangkakil i indada:
57. ⁵⁷ Iet et pil iang i. I ari kamam kin i indada: Li, i sasa i.
58. ⁵⁸ A mur kis amen kilang i indada: Koe pil amen irail. A Petrus indada: O kaidin ngai!
59. ⁵⁹ Kadekadeo murin auer eu amen katitiki indada: Melel i men et iang i, pwe i kisan men Kaliläa.
60. ⁶⁰ A Petrus indada: O i poneponeki om kasokasoi! A pitipit ni a lokelokaia malek ap kakoroteda.
61. ⁶¹ Kaun ap kotin saupeido masani Petrus. Petrus ap tamanda masan en Kaun, duen a kotin masani ong i: Mon malek kakorot, koe pan kamam kin ia pan silepak.
62. ⁶² Petrus ari koieila sangesang kaualap.
63. ⁶³ A ol oko, me kolekol i, lalaue o woki i.
64. ⁶⁴ Irail lao perala silang i, ap idedok re a indada: Kopada, is i, me pikir uk ada?
65. ⁶⁵ O song en lalaue toto, me re ki ong i.
66. ⁶⁶ A lao ran pasang saumas akan o samero lapalap o saunkawewe kan ap pokon pena o kalua i dong nan arail kapung.
67. ⁶⁷ Indada: Ma koe Kristus, ap katiti ong kit! A kotin masani ong irail: Ma I pan indai ong komail, komail sota pan kamelele;
68. ⁶⁸ A ma I pan idok, komail sota pan sapeng, o pil sota lapwa ia da.
69. ⁶⁹ Ari, sang met Nain aramas pan mondi ni pali maun en roson en Kot.
70. ⁷⁰ Ir karos ap idok: Ari, sapwilim en Kot koe? A a kotin masani ong irail: Komail me indada, pwe ngai i.
71. ⁷¹ Irail indada: Ari, menda apot kadede? Pwe pein kitail ronga sang nan au a.