요한복음 6장 폰페이어

1. ¹ MURIN mepukat Iesus kotin kotela le en Tiperias nan Kaliläa.
2. ² A pokon kalaimun me idedauen i pweki ar kilanger kilel akan, me a kotin wiai ong me somau kan.
3. ³ Iesus ap kotidala pon dol o, kaipokedi wasa o ren sapwilim a tounpadak kan.
4. ⁴ A pasa o, ran lapalap en Sus oko me korendor.
5. ⁵ Iesus lao kotin masanda masani pokon kalaimun koko dong i, ap kotin masani ong Pilipus: Ia wasa, sen neti sang ia kisin manga, pwe mepukat en manga?
6. ⁶ A kotin masani mepukat, pwen kasongesong i. Pwe pein i mangi, me a pan wiada.
7. ⁷ Pilipus potoan ong i: Prot me denar riepuki sota pan itar ong irail, pwe amen amen en tungole ekis.
8. ⁸ Andreas, sapwilim a tounpadak amen, ri en Simon Petrus potoan ong i:
9. ⁹ Kisin putak amen mia, me a lopon en prot limau o mam riamen, a sota katepa ren me toto.
10. ¹⁰ Iesus kotin masani: Kamod ong irail edi! Ari, wasa o me reen. Impan ol limekid ap mondi.
11. ¹¹ Iesus ap kotikida lopon ko, a lao laolaoki, ap kotin nek ong irail me mondier, pil dueta mam oko, irail lao metilar.
12. ¹² Irail lao metier, a kotin masani ong sapwilim a tounpadak kan: Ki pena me lua, pwe ekis der lokidokila!
13. ¹³ Irail ap ki pena kopou eisokriau kisan lopon ko, me luadi murin arail manga.
14. ¹⁴ Aramas akan lao kilanger kilel o, me Iesus kotin wiadar, re ap indada: Melel i Saukop o, me pan pwara dong sappa.
15. ¹⁵ Iesus lao kotin mangi, me re pan poto dong i, pwen kasapwiladang i Nanmarki, ap pil kotidalang nin dol o, kotin kelepala.
16. ¹⁶ A lao sautik pena, sapwilim a tounpadak kan ap kotilang ni oror,
17. ¹⁷ Kereda pon sop pot, kotela kokolang Kapernaum. A lao wasa pongier, Iesus saikenta iang irail.
18. ¹⁸ A sed me iluken, pwe ang me ma.
19. ¹⁹ Irail seisei kila mail eisoklimau de rieisok, rap kilangada Iesus a kotikotido pon sed koren iong sop, irail ap masapwekadar.
20. ²⁰ A kotin masani ong irail: Ngai i komail der masak!
21. ²¹ lrail ap men kasamo i pon sop o, a sop o madang milar ni sap o, me re ko ong ia.
22. ²² A mandan ran o pokon o, me mi palilan le, lao kilanger, me sota apot sop mi wasa o, pwe i eta, me sapwilim a tounpadak kan keredang poa, o me Iesus sota iang sapwilim a tounpadak kan kotidang pon sop o, pwe a tounpadak kan kola kelep.
23. ²³ A pil akai kisin sop me pwarado sang Tiperias, tanga dong wasa o, me re mangamanga ia, murin Kaun o kotin laolao.
24. ²⁴ Aramas akan lao kilanger, me Iesus solar kotikot ia, o sapwilim a tounpadak kan pil so, rap dake sop pot kolang Kapernaum, raparapaki Iesus.
25. ²⁵ Irail lao diaradar i palilan le, ap potoan ong: Rapi iad me re kotido?
26. ²⁶ Iesus kotin sapeng irail masani: Melel, melel I indai ong komail, komail kin rapakin ia kaidin pweki kilel akan, me komail kilang, a pweki komail kangala kisin prot ap metier.
27. ²⁷ Komail der dokki manga, me kin ola, a dokki manga me kin mimieta ong maur soutuk, me Nain aramas pan ki ong komail, pwe i me Kot Sam kileledier.
28. ²⁸ Irail ap potoan ong i: Da me sen wiada, pwen kapwaiada en Kot a dodok kan?
29. ²⁹ Iesus kotin sapeng masani ong irail: Iet en Kot a dodok: Komail en poson i, me a kadarado.
30. ³⁰ Irail ari potoan ong i: Kilel da, me re kotikida, pwe sen kilang o poson ir? Da me re kotin wiada?
31. ³¹ Sam at akan me kangala mana nan sap tan o, duen a intingidier: A kotiki ong irail prot sang nanlang, en kangala.
32. ³² Iesus ap kotin masani ong irail: Melel, melel I indai ong komail, kaidin Moses, me ki ong komail prot sang nanlang, a Sam ai kin ki ong komail prot melel sang nanlang.
33. ³³ Pwe me kodido sang nanlang, o ki ong sappa maur, iei prot en Kot.
34. ³⁴ Irail ap indang i: Maing, kotiki dong kit prot wet kaukaule!
35. ³⁵ Iesus kotin masani ong irail: Prot en kamaur ngai, me ko dong ia solar pan men mangadar, o me poson ia, solar men nim piladar.
36. ³⁶ A I indai ong komail er, komail kilang ia er, ap so poson la.
37. ³⁷ Karos me Sam ki ong ia, pan ko dong ia, a me ko dong ia, I sota pan kasela.
38. ³⁸ Pwe ngai kodido sang nanlang, kaidin pwen wiada insen ai, pwe kupur en i, me kadar ia do.
39. ³⁹ Pwe iet kupur en me kadar ia do, karos me a ki ong ia er, I ender kasela amen, pwe I en kamaureda ni ran nik o.
40. ⁴⁰ A iet kupur en Sam ai, amen amen, me kin kilang Na o poson i, en aneki maur soutuk, a I pan kamaureda i ni ran nik o.
41. ⁴¹ Sus oko ap lipanedeki i, pweki a kotin masani: Ngai prot, me kodi sang nanlang.
42. ⁴² Irail indada: Kaidin i Iesus nain Iosep? A sam a o in a se asa. Ari, daduen a indada: I kodido sang nanlang?
43. ⁴³ Iesus kotin sapeng masani ong irail: Komail der lipaned nan pung omail!
44. ⁴⁴ Sota me pan kak ko dong ia, ma Sam, me kadar ia dor, sota kainongido i. A I pan kamaureda i ni ran nik o.
45. ⁴⁵ A intingidier nan saukop akan: Irail karos pan ale padak sang ren Kot. Amen amen me rongadar o padakki ren Sam, kin ko dong ia.
46. ⁴⁶ Ari, kaidin pweki meamen kilang Sam; i eta, me kodo sang ren Kot, i me kilanger Sam.
47. ⁴⁷ Melel, melel I indai ong komail, me poson ia, iei me aneki maur soutuk.
48. ⁴⁸ Prot en maur ngai.
49. ⁴⁹ Sam omail oko, me kangala mana nan sap tan o, ir ari melar.
50. ⁵⁰ Met prot, me kodido sang nanlang, meamen kin kang sang i, sota pan mela.
51. ⁵¹ Ngai prot maur, me kodido sang nanlang, meamen kang sang prot wet, pan memaur kokolata. Prot, me I pan kida, iei uduk ai, me i pan kida en kamaur kida sappa.
52. ⁵² Sus oko ari akamaiki pena indada: Iaduen men et pan kak ki ong kit uduk a sen kang?
53. ⁵³ Iesus ap kotin masani ong irail: Melel, melel I indai ong komail, ma komail sota pan kang uduk en Nain aramas o nim nta, sota maur omail.
54. ⁵⁴ Me kin kang uduk ai o nim nt’ ai, iei me aneki maur soutuk, a I pan kamaureda i ni ran nik o.
55. ⁵⁵ Pwe manga melel uduk ai, o pil melel nt’ ai.
56. ⁵⁶ Me kin kang uduk ai o nim nt’ ai, iei me podidi ong ia o ngai podidi ong i.
57. ⁵⁷ Duen Sam ieias kadar ia do, o ngai memaureki Sam, iduen me kang uduk o nt’ ai, pan meaureki ngai.
58. ⁵⁸ Iet prot, me kodido sang nanlang, kaidin duen sam omail akan, me kangala mana ap mela, a meamen kin kang prot wet, pan memaur kokolata.
59. ⁵⁹ Mepukat a kotin masani wei nan sinakoke, ni a kotin kawewe nan Kapernaum.
60. ⁶⁰ Ari, me toto ren sapwilim a tounpadak kan, me rongadar mepukat indada: Padak pot et meid apwal! Is me kak rong?
61. ⁶¹ Iesus lao kotin angi nan kupur a, me sapwilim a tounpadak kan lipanedeki mepukat, ap kotin masani ong irail: Komail makaraki mepukat?
62. ⁶² A ma komail pan kilang Nain aramas kodala wasa, me a kauson ia mas o?
63. ⁶³ Ngen me kin kamaureda, a uduk sota katepa. Padak kan, me I kin padapadaki ong komail, iei Ngen o maur.
64. ⁶⁴ A akai mi re omail, me so poson. Pwe Iesus kotin mangi, me so poson o me pan pangala i.
65. ⁶⁵ A kotin masani: I me I indaki ong komail, sota me kak ko dong ia, ma Sam sota kainongido.
66. ⁶⁶ Sang ni ansau o sapwilim a tounpadak kan toto mueiwei sang o solar idauen i.
67. ⁶⁷ Iesus ap kotin kainoma ren ekriamen oko: Komail pil pan kola?
68. ⁶⁸ A Simon Petrus ap sapeng i: Maing, is me se en ko ong? Pwe ar masan akan iei maur soutuk.
69. ⁶⁹ A kit posonlar o asaer, me ir me Saraui en Kot.
70. ⁷⁰ Iesus kotin sapeng irail: Kaidek komail ekriamen, me I piladar, a amen komail me tewil amen.
71. ⁷¹ A kotin masaniada duen Iudas Iskariot nain Simon, pwe i amen ren ekriamen oko, me pan pangala i.