고린도전서 15장 폰페이어

1. ¹ RI ai kan i men kataman kin komail rongamau, me i padaki ong komail er, me komail pil aleer o pil tinain kidar.
2. ² O me komail pil dore kila, ma komail pan dadaurata masan o, me i padaki ong komail er, ma komail so poson mal.
3. ³ Pwe i usaki ong komail er, me i pil aleer duen Kristus, me kamata kilar dip atail akan duen kisin likau kan.
4. ⁴ O me a saredier o kaiasadar ni kasilu en ran duen kisin likau kan,
5. ⁵ O me a pwara wong Kepas, ap ong irail me ekriamen ko,
6. ⁶ Ap kotin pwara wong saulang limepuki sama ni ansau takis; kis arail me toto mimieta lel met, a akai mairedier.
7. ⁷ Murin met a kotin pwara wong Iakopus, ap ong wanporon akan karos.
8. ⁸ A ikmuri a kotin pwara dong ia mon ai ip sapal,
9. ⁹ Pwe pokindidi ren wanporon akan ngai, me sota war ong kaindinda wanporon amen, pweki ai pei ong momodisou en Kot.
10. ¹⁰ A mak en Kot, me i wanporon kilar. A kaidin mak mal eu ong ia, pwe i dodok laud sang irail karos, ari kaidik ngai, pwe mak en Kot, me mi re i.
11. ¹¹ Ari, ma ngai de irail, pwe iduen at padaki wei, o iduen komail posonlar.
12. ¹² A ma i aude pan at padak, me Kristus iasadar sang ren me melar akan, a da me akai re omail kin inda, dene me melar akan solar pan mauredar?
13. ¹³ A ma me melar akan sota pan maureda, nan Kristus pil sota iasadar.
14. ¹⁴ O ma Kristus sota iasadar, at padak me mal, o omail poson pil me mal.
15. ¹⁵ O kitail pil pan diarokada, me se saunkadede likam ren Kot, aki at kadededar, me Kot kotin kaiasadar Kristus, me a so kaiasadar, ma me melar akan sota pan kamaureda.
16. ¹⁶ Pwe ma me melar akan sota pan kamaureda, nan Kristus pil so kaiasadar.
17. ¹⁷ A ma Kristus so kaiasadar, omail poson me mal, o komail mimieta ni dip omail.
18. ¹⁸ Iduen pil irail, me melar ren Kristus akan, lokidokila.
19. ¹⁹ A ma kitail kaporoporeki Kristus nan maur et eta, nan kitail me sued sang aramas akan karos.
20. ²⁰ A melel, Kristus kaiasadar sang ren me melar akan, ap wiala meseni nan pung en ir me mamair akan.
21. ²¹ Pwe mela tapi sang aramas ta men, iduen maureda sang ren me melar akan tapi sang aramas ta men;
22. ²² Pwe duen karos me mela ki Adam, nan iduen karos pan kamaurela ren Kristus,
23. ²³ A amen amen ni kakairokdo: Kristus mas ap me sapwilim en Kristus, ni a pan kotin pwarado;
24. ²⁴ A murin mepukat pan imwi, a lao kotiki ong Kot o Sam a wei, a lao kaloedier kaun akan karos, o me poe kan, o manaman akan.
25. ²⁵ Pwe a pan kotin kaunda, lao a imwintiti karos lodi ong pan aluwilu a kan.
26. ²⁶ A ikmurin imwintiti iei mela.
27. ²⁷ Pwe a kotin mueid ong meakaros pan aluwilu a. Ari ni a kotin masanier me karos lodier a sansaledar, me i sota iang me kotin kaloedi ong i meakaros.
28. ²⁸ A meakaros lao lodi ong i, Na ap pil pan upang i, me kotin kaloedi ong i meakaros, pwe Kot en kotin poedi meakan karusia.
29. ²⁹ A ma me melar akan solar pan kamaureda, da me irail en wia, me kin paptaiseki ong me melar akan? Menda re paptaiseki ong irail?
30. ³⁰ O menda kit kin kalokolok ansau karos?
31. ³¹ Pwe ran karos i kin mela, pweki kaping pa i, me i aleer ren Kristus Iesui atail Kaun.
32. ³² A ma i pei ong man laualo nan Episus, duen aramas akan kin wiada, da kadepa ong ia, ma me melar akan sota pan kamaureda? Kitail en manga o nim, pwe lakap kitail pan mela.
33. ³³ Der duki ong, me kasongesong komail! Kasoi sued kin kawela tiak mau.
34. ³⁴ Komail ari pungala, o pirida o der wiada dip! Pwe akai sasa duen Kot. Mepukat i indai ong komail, pwen kanamenokki komail.
35. ³⁵ A ele amen pan inda: Iaduen me melar akan ar pan kamaureda? O iaduen war ar, me re pan maur kida?
36. ³⁶ Pweipwei men koe! Pwe me koe kin kamoredi, sota pan maureda, ma a sota pan mela.
37. ³⁷ O me koe kamoredi, kaidin war ota me pan para, pwe wan korn eu ta, ele wan wit de eu wa toror.
38. ³⁸ A Kot pan kotiki ong war a, duen a kotin kupura, o eu eu en war akan pan ale udan mom a.
39. ³⁹ Uduk karos kaidin song ta ieu, pwe eu song uduk en aramas akan, a eu song uduk en man akan, a eu song en manpir akan, a eu song en mam akan.
40. ⁴⁰ A war lang o war pwel akan mia, a lingan en war lang eu song o lingan en war pwel eu song.
41. ⁴¹ A eu song lingan en katipin, o eu lingan en maram, o eu lingan en usu kan, pwe nan usu kan me wuki pasang ki ar lingan eu eu.
42. ⁴² Nan iduen en me melar akan ar pan maureda. A kin kamoremoredi ap mor pasang, o pan kamaureda so mor pasang.
43. ⁴³ A kin kamoremoredi ni so lingan, o pan maureda ni lingan; a kin kamoremoredi ni luet, o pan maureda ni manaman;
44. ⁴⁴ A pan kamoremoredi war pwel o pan kamaureda war ngenin; pwe ma war pwel mia, nan a pil pan war ngenin.
45. ⁴⁵ Duen a intingidier: Tapin aramas Adam wiauier, pwen ngen maur amen, a Adam tia mur, pwen ngen en kamaur.
46. ⁴⁶ A war ngenin kaidin i men mas pwe war pwel, a muri me ngenin.
47. ⁴⁷ Tapin aramas wiaui kida pwel, a aramas kariamen kotido sang nanlang.
48. ⁴⁸ A duen tapin aramas wiauiki pwel, iduen karos me wiauiki pwel o duen men nanlang o, iduen men nanlang kan.
49. ⁴⁹ O duen kitail wa mom en pwel, iduen kitail pil pan wa mom en lang.
50. ⁵⁰ Ri ai kan, iet me i men inda: Uduk o nta sota kak sosoki wein Kot; o me mor pasang kan sota pan sosoki me so mor pasang.
51. ⁵¹ Kilang, ngai me kadiarok ong komail kaponepon eu: Kaidin kitail karos pan mela, a kitail karos pan nitwilida.
52. ⁵² Madang ni marep ta ieu, koronete en muri lao popeuk. Pwe koronete pan popeuk, a me melar akan ap pan kamauredang somor pasang a kitail pan kawilikapada.
53. ⁵³ Pwe mor pasang wet pan kiawikilang so mor pasang; o mela wet kiawikilang somela.
54. ⁵⁴ A mor pasang wet lao kiawikilang so mor pasang o mela wet kiawikilang somela, masan o ap pan pwaida, me intingidier: Maur kadalala mela.
55. ⁵⁵ Mela koe, ia om tata? Mela ia om poedi?
56. ⁵⁶ Mana en mela dip, a manaman en dip kapung.
57. ⁵⁷ Danke ong Kot, pwe a kotiki ong kitail, en poediki atail Kaun Iesus Kristus.
58. ⁵⁸ Ari ri ai kompok kan, komail kelail kaukaule o der wukiwuk sili, a kakairida ni omail wiawia en Kaun o, pwe komail asa, me omail dodok ong Kaun o kaidin dodok mal.