디도서 2장 폰페이어

1. ¹ A KOE en padapadakeki duen me kon ong lamalam en kamaur.
2. ² Padaki ong ol ma kan, ren der wukiwuk sili, a ren indand mau o ngenin, o kelail ni poson, o ni limpok, o ni kanongama.
3. ³ Pil dueta li ma kan, ren wiawia duen me kon ong saraui kan, ren der likinekine der lidun wain, a ren saunpadak en me mau,
4. ⁴ Pwe ren panaui li pulepul akan, en apapwali ar paud o pok ong nair seri kan.
5. ⁵ Ren lelapok, min, apwali nan im ar akan, kadek, peiki ong ar warok kan, pwe masan en Kot ender lalauela.
6. ⁶ Pil dueta manakap akan, panaui ir, ren lelapok.
7. ⁷ Ni wiawia mau kan karos koe kasaleda pein uk kaalemongi mau amen, ni om padak melel o lelapok.
8. ⁸ Kida padak en kamaur o namenokala, pwe me palian kitail en namenokala, o sota diar me sued kot men karaune kitail.
9. ⁹ Padaki ong ladu kan, me ren peiki ong ar saumas ni meakaros ren kaperen ir ada, o ren der katiwo.
10. ¹⁰ Ren der pirap, a irail en mau o melel ong irail, pwe ren kalinganada lamalam en Kot atail Saunkamaur ni meakaros.
11. ¹¹ Pwe mak en Kot pwarado kamaureda aramas akan karos.
12. ¹² O padapadaki ong kitail, me kitail en muei sang meakan me doo sang Kot o inong sued en sappa, ap lelapok, o pung, o dadaureta me kon ong ni sappa et.
13. ¹³ O auiauiki kapor mau, o sansal lingan en atail Kot lapalap o atail Saunkamaur Kristus Iesus.
14. ¹⁴ Me sokonpaudeki pein i ki kitail, pwen dore sang kitail sapung karos, o kamakelekel ong pein i aramas, me a pan sapwilim aneki, me kin nantiong wiawia mau karos.
15. ¹⁵ Mepukat padake kida, o panauiki, o kapung kelail ong; sota amen me pan mamale kin uk.