빌레몬서 1장 폰페이어

  1. 1 PAULUS salidi en Kristus Iesus amen, o ri atail Timoteus ong Pilemon kompoke pat o at warok ni dodok kan.
  2. 2 O ri atail li Apia, o sauas pat Arkipus, o momodisou, me mi nan tanpas omui;
  3. 3 Mak o popol sang ren Kot sam atail o atail Kaun Iesus Kristus en mi re omui!
  4. 4 I kin danke ai Kot ni ai kapakap kin komui ansau karos.
  5. 5 Pwe i ronger duen omui limpok o poson ong Kaun Iesus o ong saraui kan karos.
  6. 6 Pwe poson o me mi re ’tail en kakairida re omui, ni omui dedeki duen me mau kan karos, me mi reatail sang ren Kristus.
  7. 7 Kit peren kidar o kamait kilar omui limpok, pwe mongiong en saraui kan en kelail kilar komui, ri ai.
  8. 8 I me i aimaki ren Kristus kusoned eki ong komui duen me pan wiaui.
  9. 9 Ari so, pweki ai limpok ong komui i men poeki ta re omui, pwe ngai Paulus likailapalar o salidi en Kristus amen.
  10. 10 I poeki re omui nai seri Onesimus, me i wiadar ni ai salidi,
  11. 11 Me so katepa ong komui mas o, a met a katepa ong komui o ngai.
  12. 12 I me i kapure ong komui, komui ari apwali i, dueta pein mongiong i.
  13. 13 Pwe i mauki a en mimieta re i, pwen papa ia ni ai saliekidi rongamau, wiliandi komui,
  14. 14 A i sota men wia meakot, me sota pwili sang kupur omui, pwe omui wia mau ender mansairen a somansairen.
  15. 15 Ele a tang sang re omui ansau kis, pwe komui en pur ong naineki i kokolata.
  16. 16 Kaidin due ladu amen, a mau sang ladu amen, pwe due ri omui kompok amen; iduen re i, a re omui pan laud sang ni pali uduk a o ni pali en Kaun.
  17. 17 Ma komui akawarok kin ia, apwali i dueta pein ngai.
  18. 18 A ma a wia sapung ong komui er, de pwaipwand ong komui, i pan kapungala.
  19. 19 Met ngai Paulus intingkier pein pa i, i pan pwain, ari so, i so pan inda, me komui pwaipwand ki ong ia pein komui.
  20. 20 Ei ri ai, i men paiekin komui ren Kaun o, kainsenemauda mongiong i ren Kristus.
  21. 21 I kaporoporeki om peik, ap inting wong komui. A i asa, me komui pan wia laud sang, me inda.
  22. 22 I men, komui en kaonopada deu i, pwe i kaporoporeki, me i pan lapwadang komail ki omail kapakap.
  23. 23 En Epapras, ai warok ni ai salidi pan Kristus Iesus, a ranamau wong komui.
  24. 24 O Markus, o Aristarkus, o Demas, o Lukas ai warok en dodok kan.
  25. 25 Mak en atail Kaun Iesus Kristus kin iang ngen omail! Amen.