누가복음 1장 쇼나

1. ¹ Sezvo vazhinji vakabata kuronga nhoroondo yezvinhu zvakavimbika zvizere pakati pedu,
2. ² sezvavakapa kwatiri ivo kubva pakutanga vakazvionera, uye vari varanda veshoko,
3. ³ zvakaonekwa zvakanaka kwandiriwo, ndanyatsoongorora zvinhu zvese kubva pakutanga, kuti ndikunyorerei nekutevedzanisa, imwi Teofiro changamire,
4. ⁴ kuti muzive chokwadi chezvinhu zvamakadzidziswa.
5. ⁵ Kwaivapo nemazuva aHerodhe mambo weJudhiya umwe mupristi wainzi Zakaria, weboka raAbhiya; nemukadzi wake waibva kuvanasikana vaAroni, nezita rake riri Erizabheti.
6. ⁶ Uye vari vaviri vakange vakarurama pamberi paMwari, vachifamba nemirairo yese nezviga zvaIshe, vasina chavangapomerwa.
7. ⁷ Uye vakange vasina mwana, nokuti Erizabheti wakange ari mhanje, uye vakange vaenda pamakore vari vaviri.
8. ⁸ Zvino zvakaitika kuti wakati achiita ushumiri hweupristi pamberi paMwari, pachidanho cheboka rake,
9. ⁹ maererano netsika yeushumiri hweupristi, wakabatwa nemujenya kuti apise zvipfungaidzo zvinonhuhwira apinda mutembere yaIshe.
10. ¹⁰ Zvino chaunga chese chevanhu chakange chichinyengetera kunze nenguva yezvipfungaidzo zvinonhuhwira.
11. ¹¹ Zvino kwakaonekwa kwaari mutumwa waIshe, amire kurutivi rwerudyi rwearitari yezvipfungaidzo zvinonhuhwira.
12. ¹² Zvino Zakaria wakati achimuona akanetseka, kutya kukamuwira.
13. ¹³ Asi mutumwa wakati kwaari: Usatya Zakaria; nokuti munyengetero wako wanzwikwa, nemukadzi wako Erizabheti achakuberekera mwanakomana, ugotumidza zita rake Johwani.
14. ¹⁴ Uye uchava nemufaro nekupembera, nevazhinji vachafarira kuberekwa kwake.
15. ¹⁵ Nokuti achava mukuru pamberi paIshe, haangatongonwi waini kana zvinodhaka; uye achazadzwa neMweya Mutsvene kunyange kubva padumbu ramai vake.
16. ¹⁶ Nevazhinji vevana vaIsraeri achatendeusira kuna Ishe Mwari wavo;
17. ¹⁷ uye iye achafamba pamberi pake mumweya nesimba raEria, kutendeusira moyo yemadzibaba kuvana, nevasingateereri kuuchenjeri hwevakarurama, kugadzirira Ishe vanhu vakagadzirwa.
18. ¹⁸ Zakaria akati kumutumwa: Izvozvi ndichazviziva nei? Nokuti ini ndava mukweguru, nemukadzi wangu waenda pamazuva ake.
19. ¹⁹ Mutumwa achipindura akati kwaari: Ini ndini Gabhirieri, anomira pamberi paMwari; ndatumwa kuti nditaure kwauri, ndikuparidzire mashoko awa akanaka.
20. ²⁰ Zvino tarira, uchava chimumumu, usingagoni kutaura, kusvikira zuva rinoitika zvinhu izvi, nokuti hauna kutenda mashoko angu, achazadziswa nenguva yawo.
21. ²¹ Vanhu vakange vakamirira Zakaria, vakashamisika nekunonoka kwake mutembere.
22. ²² Zvino wakati abuda, akakonewa kutaura kwavari; vakaziva kuti akange aona chiratidzo mutembere; iye akavaninira nemaoko, akaramba ari chimumumu.
23. ²³ Zvino zvakaitika kuti mazuva okushumira kwake akati achangopera, akaenda kumba kwake.
24. ²⁴ Zvino shure kwemazuva iwayo, mukadzi wake Erizabheti akatora mimba, akazvivanza mwedzi mishanu, achiti:
25. ²⁵ Ishe wandiitira saizvozvi nemazuva aakanditarira, kuti abvise ruzvidzo rwangu pakati pevanhu.
26. ²⁶ Zvino nemwedzi wechitanhatu mutumwa Gabhirieri wakatumwa naMwari kuguta reGarirea rinonzi Nazareta,
27. ²⁷ kumhandara, yakange yatsidza kuwanikwa nemurume zita rake raiva Josefa, weimba yaDhavhidhi; uye zita remhandara riri Maria.
28. ²⁸ Mutumwa akapinda kwaari akati: Hekanhi, iwe une nyasha! Ishe anewe, wakaropafadzwa iwe pakati pevakadzi.
29. ²⁹ Iye wakati achimuona akanetseka neshoko rake, akafunganya kuti uku kukwazisa rudzii kwakadai.
30. ³⁰ Zvino mutumwa akati kwaari: Usatya Maria; nokuti wawana nyasha kuna Mwari.
31. ³¹ Zvino tarira, uchava nemimba, ugozvara mwanakomana, uchatumidza zita rake kuti Jesu.
32. ³² Iye achava mukuru, achanzi Mwanakomana weWekumusoro-soro; Ishe Mwari achapa kwaari chigaro cheushe chababa vake Dhavhidhi.
33. ³³ Achatonga pamusoro peimba yaJakobho kusvikira narinhi, neushe hwake hahungavi nemugumo.
34. ³⁴ Maria ndokuti kumutumwa: Izvi zvingava sei, nokuti handizivi murume?
35. ³⁵ Mutumwa akapindura akati kwaari: Mweya Mutsvene uchauya pamusoro pako, nesimba reWekumusoro-soro richakudzikatira; naizvozvo icho chitsvene chichaberekwa newe chichanzi Mwanakomana waMwari.
36. ³⁶ Uye tarira, Erizabheti hama yako, iyewo wava nemimba yemwanakomana pakuchembera kwake; nemwedzi uno wava wechitanhatu kuna iye wainzi mhanje.
37. ³⁷ Nokuti naMwari hakuna chinhu chisingazogoneki.
38. ³⁸ Maria ndokuti: Tarirai, murandakadzi waIshe; ngazvive kwandiri seshoko renyu. Mutumwa ndokubva kwaari.
39. ³⁹ Zvino Maria akasimuka nemazuva iwayo akaenda kunyika yezvikomo nekukurumidza, kuguta raJudha;
40. ⁴⁰ akapinda mumba maZakaria, akakwazisa Erizabheti.
41. ⁴¹ Zvino zvakaitika kuti Erizabheti wakati achinzwa kukwazisa kwaMaria, mwana akatamba mudumbu rake; naErizabheti akazadzwa neMweya Mutsvene,
42. ⁴² akadanidzira nenzwi guru, akati: Wakaropafadzwa iwe pakati pevakadzi, uye chakaropafadzwa chibereko chedumbu rako!
43. ⁴³ Ko zvandibvira nepi, kuti mai vaIshe wangu vauye kwandiri?
44. ⁴⁴ Nokuti tarira, inzwi rekukwazisa kwako rangoti richisvika munzeve dzangu, mwana watamba mudumbu rangu nemufaro.
45. ⁴⁵ Uye wakaropafadzwa anotenda, nokuti zvakataurwa naIshe kwaari zvichazadziswa.
46. ⁴⁶ Maria akati: Moyo wangu unokudza Ishe,
47. ⁴⁷ nemweya wangu unofara muna Mwari Muponesi wangu;
48. ⁴⁸ nokuti wakatarira kuninipiswa kwemurandakadzi wake; nokuti tarira, kubva zvino mazera ese achati ndakaropafadzwa.
49. ⁴⁹ Nokuti ane masimba wakandiitira zvinhu zvikuru; nezita rake idzvene.
50. ⁵⁰ Netsitsi dzake dziri kuna avo vanomutya kubva kumazera kusvika kumazera.
51. ⁵¹ Wakaita zvine simba neruoko rwake; wakaparadzira vanozvikudza mundangariro dzemoyo yavo.
52. ⁵² Wakaburusa vane masimba pazvigaro zvoushe, akasimudza vakaderera.
53. ⁵³ Vane nzara wakavagutsa nezvinhu zvakanaka, asi vafumi wakavaendesa vasina chinhu.
54. ⁵⁴ Wakabatsira Israeri muranda wake kuti arangarire tsitsi,
55. ⁵⁵ sezvaakataura kumadzibaba edu, kuna Abhurahama nekumbeu yake kusvikira rinhi narinhi.
56. ⁵⁶ Maria akagara naye mwedzi inenge mitatu, akadzokera kumba kwake.
57. ⁵⁷ Zvino nguva yaErizabheti yekusununguka kwake yakazara; akabereka mwanakomana.
58. ⁵⁸ Zvino vavakidzani nehama dzake vakati vanzwa kuti Ishe wakange amuitira tsitsi dzake huru, vakafara naye.
59. ⁵⁹ Zvino zvakaitika kuti nezuva rerusere vakauya kuzodzingisa mucheche, vakamutumidza maererano nezita rababa vake Zakaria.
60. ⁶⁰ Asi mai vake vakapindura vakati: Kwete, asi achanzi Johwani.
61. ⁶¹ Vakati kwaari: Hakuna munhu kuhama dzako anodaidzwa nezita iri.
62. ⁶² Vakataura nemaoko kuna baba vake, kuti vanoda kuti anzi ani.
63. ⁶³ Vakakumbira chinyorero, vakanyora vachiti: NdiJohwani zita rake; vakashamisika vese.
64. ⁶⁴ Muromo wake ukazarurwa pakarepo, nerurimi rwake rukasununguka, akataura, achirumbidza Mwari.
65. ⁶⁵ Kutya kukawira vese vaigara vakavakomba; nemashoko awa ese akataurwa kunyika yese yezvikomo yeJudhiya.
66. ⁶⁶ Zvino vese vakanzwa, vakazviisa mumoyo mavo, vachiti: Mucheche uyu achazova ani? Uye ruoko rwaIshe rwakava naye.
67. ⁶⁷ Zvino Zakaria baba vake vakazadzwa neMweya Mutsvene, vakaporofita, vachiti:
68. ⁶⁸ Ngaarumbidzwe Ishe Mwari waIsraeri, nokuti wakashanyira nekuita rudzikunuro kuvanhu vake;
69. ⁶⁹ akatisimudzira runyanga rweruponeso mumba maDhavhidhi muranda wake;
70. ⁷⁰ sezvaakataura nemuromo wevaporofita vake vatsvene, vakange varipo kubva pasichigare;
71. ⁷¹ ruponeso pamhandu dzedu, neparuoko rwavese vanotivenga;
72. ⁷² kuitira madzibaba edu tsitsi, nekurangarira sungano yake tsvene,
73. ⁷³ mhiko yaakapika kuna Abhurahama baba vedu;
74. ⁷⁴ kutipa, kuti tasunungurwa muruoko rwevavengi vedu, timushumire tisingatyi;
75. ⁷⁵ muutsvene nekururama pamberi pake mazuva ese eupenyu hwedu.
76. ⁷⁶ Newe mucheche, uchanzi muporofita weWekumusoro-soro, nokuti uchatungamira pamberi pechiso chaIshe, kugadzirira nzira dzake;
77. ⁷⁷ kupa ruzivo rweruponeso kuvanhu vake mukanganwiro yezvivi zvavo;
78. ⁷⁸ netsitsi dzemoyo dzaMwari wedu, mauri mambakwedza anobva kumusoro anotishanyira;
79. ⁷⁹ kuvhenekera vagere murima nemumvuri worufu, nekururamisa tsoka dzedu munzira yerugare.
80. ⁸⁰ Mucheche akakura, akasimba mumweya, akava mumarenje, kusvikira zuva rekuratidzwa kwake kuna Israeri.